Historia di futbol di Korsou 1921 2006 / druk 1

“Historia di futbòl di Kòrsou 1921 – 2006” ta duna e lesadó un bista general di e desaroyo históriko di algun aspekto di e bunita forma di rekreá aki na Kòrsou.

E outor, Prof. Dr. Valdemar Marcha, ta un yu di Kòrsou, gran amante di futbòl, ku ta sinti un amor grandi, inkondishonal i ardiente pa su isla natal. Kòrsou su historia i kultura ta su atenshon. Su aktividat profeshonal ta mas bien den e ambiente akadémiko komo profesor di siensia di maneho i kultura na Universidat di Utrecht, Hulanda.
Den e publikashonnan aki e ta laga esnan ku ta futbòl di Kòrsou di ántes, esta hungadó, entrenadó, dirigente i rèfri deskribí i pinta nan mes vishon di e desaroyo di un parti dinámiko i sano di Kòrsou su kultura. Kultura komo e manera ku nos pueblo a bin ta pensa, sinti i rekreá durante kasi nuebe dékada. Lesando e diferente relatonan den e publikashon nos por siña apresiá ainda mas e amor, pashon i dedikashon ku hopi di nos antepasadonan i grandinan di awe a inbertí den nan aktividat stima, ku ta futbòl. Tur esaki a yuda desaroyá nos komunidat i a kontribuí na e loke nos ta awe. Nos ta deskubrí hopi hérue; algun ku nos konosé, otronan ku tabata skondí te ainda. Pero, ta trabou di nan tur a kontribuí. Tabatin momentunan grandi i ménos grandi. Periodonan di gran kosecha i tambe sekura; manera tur aspekto di bida.
En todo kaso, kada lesadó por deskubrí i siña apresiá esfuersonan di hopi di nos pa yuda forma i edifiká Kòrsou; nos dushi baranka den laman.
E outor ta konsiderá e publikashon aki komo un ekspreshon di amor pa nos isla i alabes un homenahe na tur e pioneronan di nos futbòl i ta dedik’é na e persona di Sr. Richard Curiel (91) ku a traha pa 30 aña komo sekretario di Curaçaose Voetbal Bond i komo hende ta representá nos gran balornan tradishonal.